Vímulaus æska

Starfsemi

Foreldrasamtökin Vímulaus æska eru starfandi fyrir alla landsbyggðina. Samtökin voru stofnuð 20 september 1986.
Vímulaus æska rekur Foreldrahúsið í Borgartúni 6 í Reykjavík en það var opnað 8. apríl 1999.

Í nóvember 2006 var opnað foreldrahús Vímulausrar æsku í Hafnarfirði.

Samtökin sinna námskeiðahaldi og fyrirlestrum víðsvegar á landinu í samstarfi við foreldrafélög, skólayfirvöld og sveitarfélög viðkomandi staða.

Starfsemi Foreldrahússins skiptist í tvo megin flokka; forvarnir og eftirmeðferð. Í Foreldrahúsinu er starfrækt fjölskylduráðgjöf, foreldrahópar, forvarnarnámskeið og stuðningsmeðferð.
Þegar daglegri starfsemi líkur tekur foreldrasíminn 581-1799 við, en hann er opinn allan sólarhringinn. Samtökin hafa frá upphafi verið öflug í útgáfu fræðsluefnis og hafa gefið reglulega út fjölda af tímaritum og forvarnarbæklingum. Einnig hefur verið gefið út fræðsluefni á geisladiskum og myndböndum.
 

Markmið samtakana

Að vinna gegn áfengis og vímuefnaneyslu barna og unglinga.
Vinna gegn lögleiðingu ólöglegra vímuefna.
 

Af hverju Foreldrahús?

Til þess að efla forvarnir með þátttöku og stuðningi allra foreldra í landinu.

Til þess að vinna að viðhorfsbreytingu í samfélaginu gegn umburðarlyndi gagnvart unglingadrykkju og neyslu annarra vímuefna og hvetja foreldra og forráðamenn til að virða útivistartímann.

Til þess að styðja og efla foreldra, hjálpa þeim til að missa ekki trúna á sjálfa sig sem foreldri þegar börn eða ungmenni ánetjast áfengi eða öðrum vímuefnum.

Til þess að tryggja foreldrum og börnum að hagsmuna þeirra sé gætt þegar unnið er að málefnum þeirra.

Til þess að veita stuðning og ráðgjöf frá öðrum foreldrum sem hafa verið eða eru í svipaðri aðstöðu.

Til þess að vera með stuðningshópa fyrir foreldra sem fagaðilar og foreldrar sjá um.

Til þess að veita fjölskylduráðgjöf og viðtöl á lágmarksgjaldi hjá fagaðilum.

Til þess að beita sér opinberlega fyrir úrbótum í vímuefnamálum ungmenna.