Lkl. Fjörgyn, N1 og Sjóvá styðja BUGL áfram með bílarekstri

Enn á ný er Lionsklúbburinn Fjörgyn að endurnýja bíl fyrir BUGL. Tekin var ákvörðun um að skipta út Renault Traffic bílnum og nýr Dacia Duster jepplingur var keyptur í staðinn, mun öruggari bíll í akstri og sérstaklega úti á landsbyggðinni þar sem veður geta gerst válynd með skömmum fyrirvara en færst hefur í vöxt að starfsfólk BUGL sinni sínum störfum á Suður- og Vesturlandi.  

Síðustu 12 ár hefur Lionsklúbburinn Fjörgyn séð um rekstur tveggja bíla fyrir BUGL til að nota fyrir skjólstæðinga sína með dyggri aðstoð N1 og Sjóvá. Bílarnir tveir hafa nýst afar vel í starfi  BUGL og eru reglulega endurnýjaðir með öryggi og hagkvæmni að leiðarljósi.

Um nokkurt skeið var húsnæði BUGL við Dalbraut ónothæft að stórum hluta vegna rakaskemmda og umfangsmikilla endurbóta sem enn standa yfir.  Vegna þessa fór starfsfólk BUGL að flytja þjónustuna meira út til fólks og þar komu bílarnir frá Fjörgyn að góðum notum. Þessi aukna vettvangsþjónusta legudeildar BUGL hefur reynst fjölskyldum vel og hún er því komin til að vera þótt húsnæðið við Dalbraut sé smám saman aftur að komast í gagnið. Nýi jepplingurinn kemur sér þess vegna vel enda þjónustan veitt í flestu veðri og í misjafnri færð.

„Þakklæti starfsfólks og vissan um að bílarnir eru nær ómissandi í því góða starfi sem BUGL vinnur er okkur næg umbun og það er alltaf af mikilli gleði sem við leggjum okkur fram í stuðningi við þau,“ segja Lionsmennirnir í Fjörgyn. 

Fjörgynjarmenn hafa stutt við BUGL í 16 ár með margvíslegum hætti og ber þar hæst rekstur bifreiðanna tveggja. Þeir voru teknir á rekstrarleigu hjá Íslandsbanka í desember 2007 til þriggja ára og þegar sá samningur rann út keypti klúbburinn þá og færði BUGL að gjöf. Með fjáröflun og stuðningi frá Sjóvá og N1 hefur Lionsklúbburinn Fjörgyn rekið bílana síðan.
Með samningi 22. nóvember 2013 tryggðu Fjörgynjarmenn sér áframhaldandi stuðning Sjóvár og N1 við rekstur BUGL bílanna.  Sjóvá leggur til ábyrgðar- og kaskótryggingu og N1 eldsneyti á þá. Samstarfssamningurinn við Sjóvá og N1 var endurnýjaður 2017 til næstu þriggja ára.

Í Lionsklúbbnum Fjörgyn er lítill hópur sem gengur undir nafninu „litla BUGL nefndin“.  Á henni hvílir mikið starf varðandi stuðninginn við barna- og unglingageðdeildina. Tónleikanefnd Fjörgynjar skipuleggur árlega aðventustórtónleika í Grafarvogskirkju þar sem margir af bestu tónlistarmönnum þjóðarinnar gefa vinnu sína í þágu málefnisins.

 Stuðningur Fjörgynjarmanna við BUGL birtist í mun fleiru en bílarekstrinum. Hér eru nokkur dæmi um það sem þeir hafa fært starfseminni við Dalbraut:

Tveir skjávarpar og sýningartjöld
Flatskjár og ferðatölvur
Stór og öflug kaffivél
Fullkomið mynd- og hljóðupptökutæki sem notað er í viðtölum til greiningar eftir á
Húsgögn  í fjölskylduherbergi
Ipad spjaldtölvur
Húsgögn í útigarðinn
Sérsmíðað fundarborð á legudeild
Íslandskort